MPA၊ The Red Flag
9 August 2025
ကချင်ပြည်နယ်၊ ဆိုင်းတောင်ရွာတွင် KIA ပစ်ခတ်လိုက်သည့် လက်နက်ကြီးကျည်ကြောင့် အရပ်သားများ သေဆုံး ထိခိုက် ဒဏ်ရာရ ဆိုသည့် အကြောင်းအရာသည် စစ်ကောင်စီဝါဒဖြန့် တယ်လီဂရမ် ချန်နယ်များတွင် ပျံ့နှံ့ခဲ့သည်။
“People Media” တယ်လီဂရမ်ချန်နယ်က ဩဂုတ် ၈ ရက် နံနက် ၁၁ နာရီ ၈ မိနစ်တွင် ကချင်ပြည်နယ်၊ ဖားကန့်မြို့နယ်၊ ဆိုင်းတောင်ကျေးရွာတွင် KIA အဖွဲ့ ပစ်ခတ်လိုက်သည့် လက်နက်ကြီး ကျည်ကြောင့် အမျိုးသမီးတစ်ဦး သေဆုံးပြီး ကလေးငယ်တစ်ဦး အပါအဝင် ငါးဦး ဒဏ်ရာ ရရှိခဲ့ကြောင်း ဓာတ်ပုံများနှင့်တကွ ဖြန့်ဝေခဲ့ရာ ဝင်ရောက်ကြည့်ရှုသူ ၃၂,၀၀၀ ကျော်၊ Reaction ပေးသူ ၂၅၀ ကျော် ရှိခဲ့သည်။
မူရင်းသတင်းအမှားလင့်ခ် >>> https://archive.ph/6TUm5
အဆိုပါ အကြောင်းအရာကို “U Kyaw Soe Oo, Min Din” တယ်လီဂရမ် ချန်နယ်များအပြင် အခြား စစ်ကောင်စီဝါဒဖြန့် တယ်လီဂရမ်ချန်နယ်များကပါ ကူးယူဖော်ပြခဲ့သဖြင့် ပျံ့နှံ့မှု များခဲ့သည်။
တယ်လီဂရမ်ရှိ သတင်းအမှားလင့်ခ်များ >>>
U Kyaw Soe Oo – https://archive.ph/ghRtk
Min Din – https://archive.ph/Sq700
တယ်လီဂရမ်တွင် ပျံ့နှံ့နေသော အကြောင်းအရာနှင့် ပတ်သက်၍ Myanmar Fact-Checking Network ၏ အဖွဲ့ဝင်ဖြစ်သော MPA က အချက်အလက် စစ်ဆေးကြည့်ရာ သတင်းအမှားဖြစ်ကြောင်း စစ်ဆေးတွေ့ရှိခဲ့သည်။
သက်သေပြစိစစ်ချက်
တယ်လီဂရမ်တွင် ပျံ့နှံ့နေသော ဓာတ်ပုံများကို Google Lens ဖြင့် ရှာဖွေကြည့်ရာ ခေတ်သစ်မီဒီယာတွင် ဖော်ပြထားသော ဓာတ်ပုံနှင့် ထပ်တူညီနေသည်။
ခေတ်သစ်မီဒီယာတွင် ကချင်ပြည်နယ်၊ ဖားကန့်မြို့နယ်တွင် နေ့စဉ် တိုက်ပွဲများ ပြင်းထန်နေပြီး စစ်တပ်ဘက်က လက်နက်ကြီးများဖြင့် ပစ်ခတ်နေကြောင်း၊ ဩဂုတ် ၇ ရက်နေ့ ည က ဖားကန့်မြို့နယ် ဆိုင်းတောင်ကျေးရွာနှင့် ဆုတောင်းကုန်းဘက်သို့ စစ်ကောင်စီက လက်နက်ကြီးပစ်ခတ်ခဲ့မှုကြောင့် အမျိုးသမီး တစ်ဦး သေဆုံးပြီး ပြည်သူ ငါးဦး ထိခိုက်ဒဏ်ရာ ရရှိခဲ့ကြောင်း ဖော်ပြထားသည်။
အပြည့်အစုံဖတ်ရန် >>> https://bitly.cx/wkUdZ
အကြောင်းအရာနှင့် ပတ်သက်၍ Google တွင် “ ဖားကန့်မြို့ စစ်ကောင်စီ လက်နက်ကြီးပစ်” ဆိုသည့် စကားလုံးဖြင့် ရှာဖွေကြည့်ရာ “Myanmar Now, People’s Spring” မီဒီယာများတွင် သတင်းရေးထားသည်ကို တွေ့ရသည်။
သတင်းမီဒီယာများတွင် ကချင်ပြည်နယ် ၊ ဖားကန့်မြို့တွင် စစ်ကောင်စီတပ်၏ လက်နက်ကြီးပစ်ခတ်မှုများကောင့် ယခုရက်ပိုင်းအတွင်း သုံးနှစ်သား ကလေးငယ် တစ်ဦး အပါအဝင် ကိုးဦး သေဆုံးခဲ့ပြီး ဒဏ်ရာရသူ ၃၀ ကျော် ရှိကြောင်း၊ ဩဂုတ် ၇ ရက် တွင် ဆိုင်းတောင်ကျေးရွာအတွင်း လက်နက်ကြီး ကျရောက်မှုကြောင့် အမျိုးသမီးတစ်ဦးသေဆုံးပြီး ပြည်သူ ငါးဦး ထိခိုက်ဒဏ်ရာရခဲ့ကြောင်း၊ ဩဂုတ် ၄ ရက် ကလည်း ရှရော်ခ၊ မျောက်ဖြူ နှင့် ဆန်းကြွယ်ရွာများထဲ လက်နက်ကြီးကျရောက်ပေါက်ကွဲမှုကြောင့် အသက် သုံးနှစ်အရွယ် ကလေးငယ်အပါအဝင် သုံးဦး သေဆုံးပြီး ၁၃ဦး ဒဏ်ရာရခဲ့ကြောင်း ဒေသခံအသံများနှင့် တကွ ဖော်ပြထားသည်။
သုံးသပ်ချက်
သတင်းမီဒီယာများတွင် ဖားကန့်မြို့၌ တိုက်ပွဲများ ဖြစ်ပွားနေပြီး စစ်ကောင်စီဘက်က လက်နက်ကြီး ပစ်ခတ်မှုကြောင့် အရပ်သား ထိခိုက်သေဆုံးမှုများ ရှိနေကြောင်း၊ ဩဂုတ် ၇ ရက်နေ့က ဆိုင်းတောင်ရွာတွင် စစ်ကောင်စီ၏ လက်နက်ကြီးကျည်ကြောင့် အမျိုးသမီးတစ်ဦး သေဆုံးပြီး ငါးဦး ဒဏ်ရာရခဲ့ကြောင်း ရေးထားသည်ကို တွေ့ရသည်။
ထို့ကြောင့် တယ်လီဂရမ်တွင် ပျံ့နှံ့နေသော “ ဆိုင်းတောင်ရွာတွင် KIA လက်နက်ကြီး ပစ်ခတ်မှုကြောင့် အမျိုးသမီး တစ်ဦး သေဆုံးပြီး ငါးဦး ဒဏ်ရာရရှိ” ဆိုသည့် အကြောင်းအရာသည် သတင်းအမှား ဖြစ်သည်။
ယနေ့ခေတ် အင်တာနက်အခြေပြု ဆိုရှယ်မီဒီယာများတွင် သတင်းအတု၊ သတင်းအမှားများ ပျံ့နှံ့လျက်ရှိ သည်။ သတင်းအကြောင်းအရာတစ်ခုကို တွေ့၊ မြင်၊ ကြား၊ သိလျှင် အလွယ်တကူ လက်ခံ၊ ယုံကြည်၊ မျှဝေ ခြင်းများ အလျင်စလို မပြုလုပ်ရန် လိုအပ်ပါသည်။
ပျံ့နှံ့နေသောအကြောင်းအရာများအား သတင်းမီဒီယာလုပ်ငန်းစဉ်အတိုင်း အဆင့်ဆင့် အတည်ပြုဖော်ပြ နေသော သတင်းမီဒီယာများတွင် ရှာဖွေဖတ်ရှု့သင့်ပါသည်။
Myanmar Fact-Checking Network အဖွဲ့ဝင်များ အချက်အလက် စစ်ဆေးထားသော သတင်းများကို အောက်ဖော်ပြပါ လင့်ခ်များမှတဆင့် ဝင်ရောက်ဖတ်ရှုနိုင်ပါသည်။
ဝက်ဘ်ဆိုဒ်လင့် – https://myanmarfactcheckingnetwork.org/
Facebook လင့် – https://www.facebook.com/myanmarfactcheckingnetwork
