July 26 2025
By RaHu/ Myanmar Pressphoto Agency-The Red Flag
ဧရာဝတီမြစ်ထဲတွင် စစ်ကောင်စီစစ်သင်္ဘောများ ပစ်ခတ်နစ်မြုပ်ခံရဆိုသော သတင်းများသည် ဂျင်းသတင်းများ သာဖြစ် ကြောင်း စစ်ကောင်စီလော်ဘီ Kyaw Swar တယ်လီဂရမ်ချန်နယ်က သတင်းအမှား ဖြန့်ဝေထားသည်။
Kyaw Swar ချန်နယ်က ၂၀၂၅ ဇူလိုင် ၂၃ရက် ညပိုင်းတွင် ဧရာဝတီမြစ်ထဲတွင် စစ်သင်္ဘော ၃စီး ပစ်ခတ်နစ်မြုပ် လိုက်သည် ဆိုသော သတင်းများသည် မြန်မာနိုင်ငံတွင် အရယ်ရဆုံး ဂျင်းသတင်းဖြစ်ကြောင်း၊ ရုပ်သံဖိုင်ကို ဖြတ်ညှပ်ကပ်ပြုလုပ်၍ တည်းဖြတ်ထားခြင်းဖြစ်ကြောင်း ရေးသားဖြန့်ဝေထားသည်။ သတင်းအမှားလင့်ခ် – https://archive.ph/cLobh
ထို့သို့ သတင်းအမှားဖြန့်ထားသော အကြောင်းအရာသည် ဇူလိုင် ၂၆ရက် နံနက်ပိုင်းအထိ ဖတ်ရှုသူ ၃၄,၀၀၀ ကျော်၊ like and react ပေးသူ ၁၀၀၀ ကျော်နှင့် မှတ်ချက်ရေးသားသူ ၂၃၀ ကျော်ရှိနေသည်။
အခြားစစ်ကောင်စီတပ်ထောက်ခံသည့် တယ်လီဂရမ်ချန်နယ်များဖြစ်သော “ Captain Ko Thet ၊ DGF21 News” စသည်တို့က ထပ်ဆင့်ကူးယူဖြန့်ဝေထားသဖြင့် ပျံ့နှံ့မှုနှုန်း များပြားနေသည်။
သတင်းအမှားလင့်ခ်များ
Captain Ko Thet – https://archive.ph/7Ials
DGF21 News – https://archive.ph/pJ8BB
ပျံ့နှံ့လျက်ရှိသော သတင်းအကြောင်းအရာကို Myanmar Fact-Checking Network ၏ အဖွဲ့ဝင်မီဒီယာဖြစ်သော MPA အချက်အလက်စစ်ဆေးကြည့်ရာ သတင်းအမှားဖြစ်ကြောင်း စိစစ်ဖော်ထုတ်နိုင်ခဲ့သည်။
သတင်းစိစစ်ချက်
Google တွင် “ဧရာဝတီမြစ်အတွင်း စစ်သင်္ဘောပစ်ခတ်ခံရမှု” ဆိုသည့် စာသားဖြင့် ရှာဖွေကြည့်ရာ ယုံကြည်စိတ်ချရသော သတင်းမီဒီယာများစွာက စစ်ကောင်စီသင်္ဘောများပစ်ခံရမှုအကြောင်းရေးသားထားကြသည်။
Mandalay Free Press(MFP) သတင်းမီဒီယာက ဇူလိုင် ၁၉ရက်တွင် မန္တလေးမြို့မှ ဧရာဝတီမြစ်ကြောင်းအတိုင်း အထက်ပိုင်းသို့ ဆန်တက်လာသော စစ်အုပ်စု၏စစ်သင်္ဘောနှင့် ရေယာဉ် ၁၂ စီးကို တော်လှန်ရေးတပ်များက တိုက်ခိုက်ရာ စစ်သင်္ဘောများ ထိခိုက်ပျက်စီးမှု ရှိကြောင်း ရုပ်သံဖိုင်နှင့်တကွ သတင်းဖော်ပြထားသည်။
သတင်းလင့်ခ် – https://bitly.cx/y9gjk
Narinjara ၏ ဇူလိုင် ၂၁ရက် သတင်းတွင် ဧရာဝတီမြစ်ကြောင်းအတိုင်း ဆန်တက်လာသော စစ်ကောင်စီ၏ စစ်သင်္ဘော များကို ပြည်သူ့ကာကွယ်ရေးတပ်ဖွဲ့(PDF)တိုက်ခိုက်ခဲ့ရာ တစ်စီးနစ်မြုပ်ကာ သုံးစီးမီးလောင်သွားကြောင်း ပြည်သူ့ကာကွယ် ရေးတပ်မတော် (မန္တလေး)၏ သတင်းထုတ်ပြန်ချက်အား ကိုးကား၍ ရေးထားသည်။
သတင်းလင့်ခ် – https://bitly.cx/7xbjK
The Irrawaddy News က ဇူလိုင် ၂၁ရက်တွင် မန္တလေးမြို့ ဂေါဝိန်ဆိပ်ကမ်းမှ ဧရာဝတီမြစ်ကြောင်းအတိုင်း ဆန်တက် လာသော စစ်ကောင်စီ၏ စစ်သင်္ဘော ၅ စီးအပါအဝင် စုစုပေါင်း ရေယာဥ် ၁၄ စင်းကို မတ္တရာ၊ စဥ့်ကူးနဲ့ သပိတ်ကျင်း မြို့နယ်များရှိ မြစ်ကမ်းစပ်များအဖြတ်၌ မန္တလေး PDF ဦးဆောင်သော အဖွဲ့များက ရေမြှုပ်မိုင်း၊ ရှော့တိုက်ဒုံး၊ နောက် ပွင့်လောင်ချာ အပါအဝင် လက်နက်မျိုးစုံနှင့် အပြင်းအထန် တိုက်ခိုက်ခဲ့ကြောင်း ရုပ်သံသတင်းတင်ဆက်ထားသည်။ သတင်းလင့်ခ် – https://bitly.cx/gDcj8
ထို့အပြင် ဇူလိုင် ၂၂ရက်တွင် MDY-PDF က တယ်လီဂရမ်ချန်နယ်၌ စစ်သင်္ဘောများကို တိုက်ခိုက်ခဲ့သော ရုပ်သံမှတ်တမ်းဖိုင် ကို ရိုက်ကူး၍ သတင်းထုတ်ပြန်ထားသည်။ ထုတ်ပြန်ချက်အပြည့်အစုံကြည့်ရှုရန်လင့်ခ် – https://bitly.cx/lGTBi
သုံးသပ်ချက်
သတင်းမီဒီယာ လုပ်ငန်းစဉ်အတိုင်း အတည်ပြုဖော်ပြနေသော သတင်းဌာနများက ဧရာဝတီမြစ်အတွင်း စစ်ကောင်စီတပ်၏ စစ်သင်္ဘောများနှင့်ရေယာဉ်များ တိုက်ခိုက်ခံရမှုအကြောင်း ဖြစ်မှန်နှင့် သတင်းအမှန်အား ရေးသားဖော်ပြထားကြသည်။
စစ်တပ်ထောက်ခံသော Kyaw Swar တယ်လီဂရမ်ချန်နယ်က စစ်သင်္ဘောများ ပစ်ခတ်နစ်မြှုပ်ခံရမှုအား ဂျင်းသတင်းဟူ၍ ဖြန့်ဝေထားသောအကြောင်းအရာက သတင်းအမှားဖြစ်သည်။
ယနေ့ခေတ် အင်တာနက်အခြေပြု ဆိုရှယ်မီဒီယာများတွင် သတင်းအတု၊ သတင်းအမှားများ ပျံ့နှံ့လျက်ရှိ သည်။ သတင်းအကြောင်းအရာတစ်ခုကို တွေ့၊ မြင်၊ ကြား၊ သိလျှင် အလွယ်တကူ လက်ခံ၊ ယုံကြည်၊ မျှဝေ ခြင်းများ အလျင်စလို မပြုလုပ်ရန် လိုအပ်ပါသည်။
ပျံ့နှံ့နေသောအကြောင်းအရာများအား သတင်းမီဒီယာလုပ်ငန်းစဉ်အတိုင်း အဆင့်ဆင့် အတည်ပြုဖော်ပြနေသော သတင်း မီဒီယာများတွင် ရှာဖွေဖတ်ရှုသင့်ပါသည်။
Myanmar Fact-Checking Network အဖွဲ့ဝင်များ အချက်အလက် စစ်ဆေးထားသော သတင်းများကို အောက်ဖော်ပြပါ လင့်ခ်များမှတဆင့် ဝင်ရောက်ဖတ်ရှုနိုင်ပါသည်။
ဝက်ဘ်ဆိုဒ်လင့် – https://myanmarfactcheckingnetwork.org/
Facebook လင့် – https://www.facebook.com/myanmarfactcheckingnetwork
